أهم جزء من كلمة القرموطى فى فيلم معلش احنا بنتبهدل :))

س: يا سيد القرموطى ..و لماذا ظهرت فى الشريط بذقن و شكل مختلف؟

ج: هواااا بالنسبة يعنى لموضوع الدقن دى... يعنى كانت ماكياج يعنى لا مؤاخذة.. و الشريط اللى انتو شوفتوه ده... شريط متفبرك.. فيلم... و الله العظيم تلاتة فيلم... انتو مضحوك عليكو يا جماعة زى ما احنا مضحوك علينا بالظبط... اسكتوا شوية .. بتهيصوا على ايه... ما تبصولى كويس... ده منظر ارهابى؟ ده شكل واحد ارهابى؟؟؟؟ ده لبس زبالين... انا عندى نووى؟؟؟ مايروحوا يتشطروا على اللى عندهم نووى بحق و حقيق...و لا هم ما بيتشطروش غير علينا احنا بس؟!! و انا بقولها قدام مستر بريزدنت بوش و قدام العالم كله....انت لو ثبتت ان كوريا الشمالية عندها نووى..... و المصحف لا تضرب سوريا... و لو عايز تضربنى انا كمان قدام العالم كله...يالا... اضربنى... عايز تكتم بقى و تخرسنى ... اخرسنى... قدام العالم كله اكتم بقى عشان تبين للناس الحرية الأمريكانى اللى انتو جايبنهالنا...  ما اتخلقش اللى يخلى القرموطى يقفل بقه... أو يقول كلام غصب عنه.... مش هتمشونا على مزاجكم... مش هتمشونا على مزاجكم... مش هتمشووووووووونا على مزاجكم.

مين اللى طفى النور؟

  و لأن فيه حاليا عندى كهربا... أقصد النور مش قاطع عندى يعنى... فأنا هحاول اتمتع بالبذخ اللى انا فيه و اكتب البوست ده.
هبتدى بجزء "تأريخى".. يعنى أسجل فيه اللى بيحصل فى فترة زمنية معينة... و هى الفترة اللى عايشينها وقت ما بكتب البوست ده.حاليا فى مصر يا جماعة الشعب عايش كله فى ظلام دامس بسبب اللهو الخفى اللى بيقطع علينا النور كل يوم تلات او اربع او خمس او سبع مرات بشكل دورى منتظم ... بلا كلل و لا ملل و لا استئذان حتى.

مصر بقت ضلمة ... و نظام ادخلوها آمنين .. ادخلوها سالمين... بتاع شادية (الله يمسيها بالخير) ده تنسوووه تماما... لان لو حد ماشى ع السريع جاى من طريق المطار ... لازم يحسس ع الطريق و الا هيدخل فى دبشة و هيبقى دخلها بحادث أليم.

فى مصر... الرفاق حائرون... يتساءلون ... يفكرون...  اللى بيطفى النور... من يكون؟؟؟؟
و كعادتنا كمصريين و لاننا كتير بسم الله ما شاء الله... فا تلاقى فى ال90 مليون مصرى... 90 مليون احتمال و فكرة.
كل واحد طالع بنظرية و عامل عارف مين اللى بيطفى النور. و بيستغل الفكاكة اللى عندنا دى بعض الجهات... بدون ذكرها... فى انها توجه اصحاب الاستنتاجات القريبة من بعضها الى توجه معين... يعنى مثلا... اللى بيفكروا ان النور بيتقطع بأيدى الاخوان بشكل عام... نزل لهم خبر من كام يوم انه تم القبض على عصابات و تنظيمات اخوانية تقوم بتفجير محطات الكهربا.(علامة تعجب)
الناس اللى عايزة استقرار... طلع وزير "قطع" الكهربا... و قال تصريحات طمنهم فيها ان الكهربا بعد أربع سنين مش هتقطع نهائيا.
(علامتين تعجب)
الناس اللى وراها أشغال و مش مع الاخوان و لا مع غير الاخوان... طلع لهم تصريح تالت... من نفس الوزير... ان هيبقى فيه عدالة فى توزيع الظلام باذن الله فى الفترة المقبلة. ( حبيب هارتى)
(علامة استفهام)

و الناس الفرافير الحلوين... المذوقين اللى بيحبوا الادب و الاخلاق و الشياكة...  نشرت لهم الصحف خبر سعيد و بشرة خير ... ان المواطنين ممكن يستعلموا عن مواعيد قطع الكهربا بالصلاة ع النبى قبل ما الكهربا تقطع.... ( و المصحف ما انا حاطه علامات ترقيم أصلا)


نفضوا دماغكم بقى من الكلام ده.... و تعالوا هنا... عايزين نعرف... مين اللى بيطفى النور؟؟؟؟؟؟؟؟؟؟؟؟؟؟؟؟


انا بقترح ان احنا نكلم حد من بتوع الفلك و اللى بيضربوا الودع و نخليه يفتح لنا المندل او يقرا الكف لكل واحد يروح له... اه... ما هو ممكن يكون محدش بيقطع الكهربا و المشكلة فى شبكة الاسلاك اللى عند سيادتك و بسلامتك عايز تلزقها فى اى حد و السلام. و اهى بلاوى و بتتحدف علينا. 

لو الاقتراح ده هلامى و اهبل ... نخش على اللى بعده... ممكن مثلا.. نحاول نطلب من اى واحد من الرجال الخارقين بتوع السينيما الأمريكية ييجى يحل لنا المشكلة... سوبر مان... بات مان... انشالله تن تن حتى.... و بقواهم الخارقة و نظرهم السوبر... اول ما يلمحوا حد بيلعب فى محطة كهربا ينزلوا عليه يبططوه و يعلقوه. و يسيبونا احنا نتصرف معاه بعد كده... الشعب هيقوم معاه بأحلى واجب. 
(هم بس يجيبوه تحت ضرسنا و مسيرك يا ملوخية تعدى تحت المخرطة)
لو غلبنا أوى بقى.... و استكمالا للحلول الوهمية .... ممكن...
 نسأل كبيرنا... اللى احنا نور عينيه.... اللى من يوم ما رقصوا فى الشوارع على بشرة خير يوم تنصيبه و احنا معدتنا كركبت.
مين اللى طفى النور يا ريسنا؟؟؟؟ 

هو انت مش ريسنا برضه؟؟؟ مش المفروض ان لو محدش فى البلد كلها عارف ايه اللى بيحصل.. تكون انت عارف؟؟؟؟

مين اللى بيقطع الكهربا فى كل مناطق و مدن مصر بانتظام ...و بالكثافة دى؟؟؟ و ليه؟؟؟؟

و اوعى تقول جماعات اخوانية...اوعى تقول ضغط على الشبكات...اوعى تقول اى حبشتكنات...

اوعى تقول مفيش فلوس...اوعى تقول بديكم دروس...

اوعى تسيبنا فى الضلمة... أحسن الضلمة بدئت تدخل فى نفوسنا...
اوعى تفتكر ان الضلمة مش هتوصل لك...
اوعى تسيبنا و تهملنا و احنا فى رقبتك...


اوعى ت.......



يا دى النيلة!!!!!!!!!!!!!!
الكهربا قطعت....
مين اللى طفى النور؟؟؟!!!!!

###

بقلم: نهى حجاج