ليه تتحرش لما ممكن تتعالج؟؟؟ ربنا يشفيك.

الجزء الأول فى النوت أنقله لكم كما قرأته و بعدها أكتب تعليقى عليه:

 
لو التحرش سببه تأخر سن الجواز ؟ اللي عنده 45 سنه و متجوز و عنده 3 عيال بيتحرش لية ؟؟
لو التحرش سببه لبس البنت ؟ بيتحرشوا بالمحجبة زي اللي مش محجبة لية ؟؟
لو التحرش سببه نزول البنت اصلا من البيت ؟ طيب معاكسات التلفونات لية ؟
لو التحرش سببه الكبت الجنسي عند الشباب ؟ اللي عنده 12 سنه بيتحرش ليه ؟
لو التحرش سببه جسم البنت و مفاتنها ؟؟ بيتحرشوا بالبنات اللي عندها 11 و 12 سنه ليه ؟؟
لو التحرش سببة الفقر ؟ مدير الشركة بيتحرش بالسكرتيرة لية ؟
بأختصار اللي بيتحرش مجرد حيوان مش قادر يسيطر علي غريزته .. انه يبرر اللي بيعمله ان مش هو السبب فيه دا ملوش غير معني واحد .. انو ملهوش عقل و غريزته القذرة هي اللي بتحركة .. يعني الحيوان أحسن منه كمان

"منقول"

____________________________________________________

الناس المريضة اللى بتحاول تقول ان البنت او الست هى سبب التحرش الاول دى ناس مجرمة... اى نعم فيه بنات و ستات بيلبسوا بشكل مبالغ فيه... لكن دول مش كل نسبة المتحرش بيهم ابدا... و لا نص النسبة.... و لا لبسهم مبرر لراجل متزن و محترم او حتى طفل انه يتحرش بيهم...و انا واحدة من الناس اللى عشت التجربة و عارفة ان لبسى محترم و سلوكى محترم و اتجرحت كتير لما كنت بسمع شوية حيوانات بيبرروا لحيوان زيهم انه اتحرش بانسانة فى الشارع.... و ان شاء الله يحصل فى بناتهم كلهم.

 دى ناس مش بتفهم... و يمكن لما يحصل لبناتهم يعرفوا ان البنت مش هى سبب التحرش و يدوروا بقى على الاسباب الحقيقية للى بيحصل ده.

 منقدرش ننكر ان انحدار الثقافة و التعليم و القيم بشكل عام جعل من المجتمع شريك فى الجريمة دى و لازم الجيل اللى طالع ده يتربى صح على قيم مختلفة... الناس ماشية بشورت و فانلة فى اوروبا...رجالة و ستات.. و انا شوفت ده بعينى... محدش بيفكر يبص لحد اساسا... على شواطئ البحيرات فى النمسا... الستات بيعملوا "تان" و هم توبليس... محدش بصلهم.... مش بقول ان غايتنا او ان المفروض نعمل زيهم و لا حاجة... لكن لازم نبتدى نحترم نفسنا و نحترم خصوصية غيرنا... بدل ما كل متحرش مستحل لنفسه اى واحدة فى الشارع... اللى لابسة محترم و المتبرجة على حد سواء... دى اخلاق و ثقافة شعب انحدرت للاسف... و بقينا دالوقتى بنبص للغرب على انه القدوة... شئ مؤلم.

(اللى مقتنع ان البنت هى السبب فى التحرش ياريت يتفرج على حلقة خواطر فى الموسم الرابع لأحمد الشقيرى و يشوف تجربة حصلت فى دولة عربية شقيقة عن المعاكسات و التحرش و بعدها يحكم بنفسه... الحلقة عنوانها: معاكسات .. و دى اللينك بتاعتها

https://www.youtube.com/watch?v=ysNmFv3r_uI
)

انا ببص لمسرحيات كمان زى مدرسة المشاغبين و افلام زى بتاعة رمز الجيل المهبب تامر حسنى (برغم ان صوته مش ولا بد) و افلام اللى قبله... زى عادل امام ... اى نعم بعض أفلامهم لها رسالة ... لكن كان فيها سم جوا العسل... وصلوا سلوكيات لأجيال كاملة اقل شئ يتقال عنها انها سلوكيات مخزية.... شئ يكسف بجد. بس دالوقتى طلعت افلام و مسلسلات بتحارب ده... حتى فى تركيا... انا مش بتابع المسلسلات  التليفزيونية لكن سمعت و شوفت بعض حلقات من المسلسل التركى اللى العالم كله تقريبا شافه عن فاطمة اللى تم اغتصابها و العالم اتعاطف معاها ضد مغتصبيها.... و نزلت افلام فى مصر بتورى مجتمع اطفال الشوارع و المتحرشين منهم و من فئات غيرهم... دالوقتى بقى لازم الناس تفهم ان المعاكسة اللى كان بيعاكسها عادل امام ليسرا و تحرشه بعديلة فى سلسلة الافلام اللى بعتبرها هابطة كان شئ المفروض يكون له عقاب مش المفروض نضحك عليه و ندفع فى شبابيك التذاكر علشان ندخل نشوفه.

و فى النهاية لازم اقول كلمة للحق,,,المتحرش شخص مريض... مش قادر يتحكم فى غريزته او فى افكار فى مجتمعه المريض جعلت من غريزته سلاح ذو حدين..... سلاح يؤذى المتحرش بهن و المتحرش نفسه... لو لقيت شخص متحرش,,, اول شئ حاول تجعله ينتهى عما يفعل و لو لحظيا... و بعدها حاول تكلمه و تفهمه ان ده مرض و انه كإنسان أفضل من انه يكون حيوان بيتحرش بانسانة فى شارع .... و لو ما تقدرش تعمل اى حاجة من اللى قلتهم..... يبقى اخيرا حاول تدعيله بالشفا فى قلبك.

نهى حجاج