توتة توتة
و اهى الحدوتة
حدوتة لكن ملتوتة
و عندى كلمة صغتوتة
و هقولها لا أموت مكبوتة
***********************
كنت فى يوم م الايام
و انا قاعدة سمعت كلام
إن المنتخبات يا سلام
راح تلعب فى البطولات
************************
قلت أهو كله رياضة
و بدون تطويل و لماضة
أصلى ماليش فى الماتشات
*************************
قال فجأة سمعت صويت
و الناس بتقول يا مغيت
مصرى و جزايرى اتخانقوا
على حادثة باص عبيط
************************
و يهودى واقف بره
صهيونى كمان بالمرة
و يقولك مصر دى حرة
و جزائرى هتفضل درة
و كأن الأرض دى أرضه
و ده شرفه
كمان عرضه
و هفضل أقولها انا برضه...
غلطان كل اللى سمع له.
************************
و اهو عمل اللى عليه ووقع
بنظام شعللها و ولع
بلدين كانوا هم المرجع
لقيم... و رموز بتطلع
************************
و جزايرى يقول شتمونى
و مصرى يقول ضربونى
و انا بقولكوا سامحونى
ماهو يمكن انا الغلطانة
*********************
و يسبوا و يلعنوا بعض
و يدبدبوا كده ع الأرض
المصرى يقوله دى أمك
و التانى يقوله دى أمك
و لا ده يعرف ل ده أم
و لا ده يعرف ل ده أم
و الله دى حاجة تغم
و قذارة و حرقة دم
***********************
و واحد يقول للتانى
الأرض دى هى مكانى
و مصر دى أم الدنيا
التانى يقوله أغانى
***********************
و التانى يقول و يعيد
ده تاريخنا كله مجيد
يشهد له ألف شهيد
مات على أرضى يا رعديد
*********************
و المصرى يفتح دفتر
لتاريخ كله مشاغبات
و جزايرى يروح و يدور
على حاضر الانكسارات
**********************
و المصرى يقوله دى نقطة
فى بحرك م الغلطات
يرد جزايرى يقوله
انا بحر انتم محيطات
و لا يعرف ايه بيقوله
و مشمت فينا عزوله
**********************
و بجد دول لو يفتكروا
هنقضى اليوم ده بطوله
نسترجع ذكرى الوحدة
بومدين و الثورات
عبد الناصر يا حبيبهم
و تاريخ الانتصارات
فجأة كل ده مات...
و اختفت الابتسامات...
و اتخلقت المقامات...
و مقضينها معايرات؟؟؟
*************************
و الكل هارينا شتيمة
مع ان مصر عظيمة
و جزايرى بتجرى فى دمى
و تاريخها له معنى و قيمة
************************
و مصر دى لو هانت
و الشهدا هناك لو قامت
و حقيقة كل ده بانت
هنقول وقتها إيه لبعض؟؟؟
###
No comments:
Post a Comment