مش كفاية يا مشيرى مش كفاااااية
(مع الاعتذار لأغنية الراحل فريد الاطرش)
................................................
تنبيه...
الى كل شعب مصر الباسل المناضل ذو النخوة......
المقالة دى مش لكم
المقالة دى لحزب الكنبة العظيم... اللى بقى الممثل الأول للشعب عند مجلسنا العسكرى الموقر...
*************************
الى أعضاء حزب الكنبة و الفئة الصامتة و من لا يريد الا الاستقرار و العمل و الأكل و الشرب و الحياااااااااااااة
فلنتفق فى بادئ كلامنا على شئ هام جدااااا....
النوت دى مش تريقة على حد و لا تقليل من شأن حد و لا حتى للتوبيخ على أى شئ... بل هى مجرد نوت توضيحية لما تمر به مصر الآن... من وجهة نظرى الشخصية المتواضعة...
و لنتفق على شئ آخر لا يقل أهمية عما سبق.. ألا و هو ان كاتبة النوت.. و كل من فى الشوارع و الميادين يريدون لمصر نفس ماتريدونه و ماتتمونه... بل و يتمنون لأنفسهم أيضا الحياة و الرخاء و الأكل و الشرب و الزواج....الخ.... حتى و ان هانت أرواحهم الآن فى سبيل مبادئهم لكن هم فى الأصل مثلكم... مجرد مصريون يريدون أن يروا -و ان يعيشوا- فى مصر أفضل لهم و يزيدون عليكم فى أنهم لا يريدونها أفضل لهم فقط... و لكن للجميع...
بعد اتفاقنا تعالوا نقول المفيد بقى...
بادئ ذى بدء يجب علينا لنلم بجوانب الوضع الراهن ان نستعرض انجازات المجلس العسكرى و المشير منذ 11 فبراير حتى هذه اللحظة.. و قد لخصتهم فى عشرين نقطة على سبيل المثال لا الحصر.... و هى:
*
*
1-تأليف حكومة خيبانة عدمانة.. أغلبها فلول.. و اللى كنا فاكرينه عدل فيها طلع عصام قرفففف...
2-ماحاكمش قتلة الشهداء... و لا حتى كرمهم التكريم اللائق ...لا و ضرب أهاليهم و سوحهم و ما اخدوش منه غير الوش الجبس...
3- فلوسنا المتهربة ما رجعتش بعد ما الكل ظبط اموره فى ظل حكمهم المشرف...
4- حاكم اكتر من 15000 مدنى عسكريا و حاكم-و ياريت حاكم حتى- مبارك و العادلى مدنيا...
5- قعد يشيل و يعين فى محافظين فلووول و يقرف الناس بيهم... و يتوه بيهم الرأى العام و يلهيه...
6- قعد يلهينا بقوانين منع التظاهر و الاعتصام و هو مش عايز يطبق قانون العزل السياسى لفلول الوطنى اللى هجموا على الانتخابات بعد ما كمان عملوا أحزاب فى ظل مباركته ... "مبارك"ته... واخد بالك انت؟؟؟
7- عمل فتن زرعها "الأمن الوتنى" الجديد بين المسلمين و المسيحيين ايام ما كنا بنطالب بالمحاكمات العلنية و غيره.. و فضل سايب الناس تخبط فى بعض و مفهمنا انها مشكلة مسيحيين و مسلمين علشان نخاف و نكش و يغيبنا عن حاجات تانية...
8- ايام ماكان بيحاول تثبت كفاءة و عامل "حاميها" رزعنا استفتاء"فرقة وطنية" ...ده اللى هو عكس "الوحدة الوطنية" ....و قسم الشعب بين نعم و لا...و رزعنا بعدها اعلان دستورى غير دستورى بالمرة... غصب و اقتدار....
9- شرطته العسكرية و الامن المركزى اللى شغال بعلمه و اوامره و الشرطة العادية زادوا شراسة ووساخة و دناءة و اندهس اولاد مصر تحت مدرعاتهم و انضربوا حى و خرطوش و مطاطى.. و الناس قرب يجيلها سرطان و ربو مزمن من كمية الغاز السام المحرم دوليا اللى بقالنا أيام بنشم فيه.....
10- الأسعار زادت....
11- البلد بقت مقلب زبالة بفضل قيادته "النظيفة"...
12-مفيش شرطة أصلا لخدمة الشعب...
13-لم يتم الفصل فى محاكمة أى فاسد من الفاسدين فى حين تم الحكم على ظباط 8 ابريل و على ال15000 الف مدنى اللى اتحاكموا عسكريا فوراااا و بدون حق او جناية ارتكبوها....
14-طلعت سوزان براءة...
15-طلعوا الظباط قتلة الشهداء براءة و تمت ترقيتهم....
16-قبض على النشطاء و الثوار بحجج فارغة و من غير حجج او اسباب فى احيان كثيرة... و خوّن فى 6 ابريل بشكل مباشر و فى ائتلافات الثورة كلها بشكل عام غير مباشر فى رسايله اللى هرانا بيها على موقعه الرسمى فهمى نظمى...
17- لا اتحط حد أدنى - و لا أقصى حتى- للأجور... و هيااااااااااااااا دى العدالة الاجتماعية اللى كنا بنطالب بيها صحيييييييييح يوم 28
يناير
18- طبّخ موضوع اختراق الحدود مع اسرائيل و هان عليه جنودنا و بنى حوالين سفارة الصهاينة جدار برضه للتعتيم على مصايبه و مماطلة المجلس فى تنفيذ إرادة الشعب
.
.
.
و أخيرا و ليس آخرااااا
شهااااااااااااااااااااادة الزووووووووووووووووور يا شقى .... فى قضية ولى نعمة المشين ...المخلووووع
.
.
.
.
كفاية كده و لا نقوووووول كمااااااااااااااااان؟؟؟؟؟؟
آدى إنجازات المشير.. و انجازات المجلس حامى الحما.....
عملوا ده كللللللللللللللله فى عشر شهور اومال لو زادوا عن كده.....هيعملوا فى مصر و فينا إييييييييييييييييه؟؟؟؟؟؟
نرجع لمرجوعنا و نشوف ايه سبب الأزمة الحالية لان فيه ناس مش مستوعبة اللى بيحصل... حتى أنا شخصيا و لفترة ما...كنت بحاول أفك شفرة و طلاسم الأزمة الأخيرة الى ان اهتديت إلى الآتى...
المجلس بعد سلسلة طويلة من محاولات التفرقة بين طوائف الشعب و تظبيطه على انه مايبقاش فيه حد تلتف حوله الجماهير العريضة من حزب الكنبة بالذات... و بعد الاتفاقات وليدة بير السلم مع الاخوان -بالذات برضه....
و فى محاولة لتهدئة بعض الثوار- الوحشين- اللى اخدوا بالهم ان مهلة ال6 شهور اللى المجلس اعلن بنفسه انه هيسلم السلطة فيهم بعد تنحى المخلوع خلصت .... قام ايييييييييييه... قالك نعمل انتخابات بدل ما تطمطم على دماغنا.... بس طبعا الانتخابات دى مش هيكسب فيها الا اللى على مزاجه....
المجلس بيخطط و يتكتك لأنه يحط ناس شبهه ...ماتلفش الحبل حوالين رقبته لما تمسك السلطة.....
بس المجلس لقى نفسه اتزنق زنقة سودا... و كان لسان حالهم بيقول: " احنا دالوقتى عملنا اللى علينا... و الشعب كله مفكك و مشتت... و حزب الكنبة معانا علشان دخلت عليه حكاية اننا هنعملهم استقرار.. و بقوا خايفين من التتار اللى هيهاجموا البلاد و من الحرب الأهلية الوشيكة...اللى عرفنا نقنعهم بانها خلاص بتخبط على باب البلد... تمام اوى كده....بس احنا لو حد نجح من الناس اياها..اللثورجية و اللى رافعين لنا راية التغيير... يبقى نتوقع ان الراية دى هتتلف على رقابنا تانى يوم ما ينجحوا فى الانتخابات... و احنا كده هنروح فى البلالا ... و لنا ناس مصالحها معانا من برة و جوا البلد... لو الثوار ماموتوناش...الناس دى هتموتنا علشان مانفضحش أسرارهم.... طيب ايه العمل؟؟؟؟ ماطبقناش قانون العزل السياسى للفلول...قام الثوار عملوا حملات توعية و الناس عرفت كل الفلول و مش هتنتخبهم....يعنى مش هنلاقى اللى يدارى علينا و نديلة "جزء" من السلطة و احنا مطمنين.....امممم... الوفد ..الحزب ابو تاريخ... اللى بقى معانا برضه اتفهم انه فلول......الاخوان مظبطين نفسهم... و عاملين لهم شعبيه على حس الجهل و اللحمة اللى بيوزعوها على الناس و السكر و الزيت و شنط المدارس و خلافه و شكلهم هينجحوا... و دول مش هيرحمونا لو مسكوا...اى نعم هيداورا علينا... لكن هيطلعوا اللى فات كله على جتتنا و لازم هينصصوا معانا...ده لو رضيوا ياخدوا النص بس... و هيبتدوا هم يعملوا صفقات خاصة مع اللى برة و السبوبة تروح من ايدينا.... ايه العمل؟؟؟؟؟؟؟؟؟؟؟؟؟؟؟
آااااااااااااااه... كانت تايهة عننا ازاى دى؟؟؟ احنا نخبط الشعب وثيقة دستورية.... تضرب فى نافوخ الثوار تضمن ان الانتخابات دى ما تتمش ابدا..... الوثيقة تخلى فى ايدينا كل الصلاحيات برضه... حتى بعد ما تتم الانتخابات و يتكون البرلمان.... و يبقى كده هتحصل حاجة من اتنين...... يا اما الناس تفضل نايمة و ماتثورش على الوثيقة و فى الحالة دى نمشى كلام الوثيقة و يبقوا يبلوا الانتخابات و يشربوا ميتها و هنفضل احنا اللى ماسكين البلد.... او الناس تثور على الوثيقة و تحصل مشاكل كتير و الميادين تتملى بالثوار و ساعتها تتأجل الانتخابات او تتلغى خالص... و هو ده اللى احنا عايزينه... و مش كده بس... ده احنا ساعتها بقى نتسلى على اللى هينزلوا الميدان دول و نظبطهم ... ضرب و تعذيب و قتل و تشويه....نخليهم يقولوا حقنا برقبتنا.... و اضرب المربوط....يخاف السايب...هههههههه"
ده باختصار شديد و ببساطة اللى حصل يا جماعة
لكن يمكرون و يمكر الله و الله خير الماكرين.............. الثوار و الناس صاحبة النخوة و محبى الحق و العدل....أشرف ناس فيكى يا مصر..نزلوا الميدان فعلا.... و اتقتلوا و اتشوهوا فعلا لكن اللى حصل هو مش اننا خوفنا و كشينا ... اللى حصل ان كل شهيد مات... بطرق القتل و القمع اللى المجلس باركها... صحت العالم كله على اكذوبة "المجلس حامى الثورة... هو و الشعب ايد واحدة"............ و صحينا على حقيقة مفجعة..... هى ان المجلس و الداخلية القديمة هما اللى "رجل" واحدة...
و بدئت تسقط الأقنعة مع كل شهيد بيموت على تراب بلدنا.. و يترمى جنب صندوق الزبالة....
يمكن يكون بيموت أشرف ناس فى مصر.......
و فعلا بتخسرهم مصر و بتخسرهم الثورة.... لكن مع كل شهيد بيموت...عائلة كاملة بجيرانها و أصحابها و البعيد و القريب من أهلها بتدخل بكل قوة لتعداد الثوار ..........
بيفتكروا انهم بيقضوا على الثوار و يبيدوهم...مش عارفين انهم بيزودوا عدد الثوار بعملهم الاسود ..........
خطتك بتتهاوى يا مجلس... و نيتك السوداء بتنكشف يوم بعد يوم....
و انا حاليا قادرة اشوف فى خيالى السيناريو الآتى......
الثوار صامدون...الاشاعات اللى بتتروج ان الثوار بلطجية و انهم رايحين يخربوا الميادين و الاماكن الحيوية فى البلد هتموت مع موت كل شهيد... و فى الآخر.. هيتقهقر الأمن المركزى... هيزيد تحالف ظباط الجيش مع الشعب... هيتم احتلال ماسبيرو... هييجوا الناس اللى هتكون حكومة الانقاذ الوطنى... هنسمع ان المشير هرب هو و المخلوع و الحاشية ... السجون هتتفتح برضه بأوامر الخونة قبل ما يمشوا علشان الناس تخاف و تتلهى عن أخبار هروبهم المتتالية...هتتكون حكومة انقاذ وطنى... البلد هتبقى مليطة... لحد ما الحكومة الجديدة تعرف تسيطر على الوضع...
احنا يا جماعة مش أقل من تونس و ليبيا اللى فهموا اللى بيحصل.... و عملوا الحكومة الانتقالية اولا و من بعدها هيشكلوا لجنة للدستور.... الناس دى فهمت صح..... نقوم احنا يا مصريين... نفهم غلط... و نمشى ورا اللى بيموتنا و يكشف عذرية بناتنا... و يشوّه أولادنا... و يسرق فلوسنا... و يقبض على شبابنا ... و يموتهم من التعذيب فى طرى... و هو سايب المخلوع و اولاده بيبرطعوا.... و ساب قتلة الشهداء و رقاهم و كرمهم... و رمى موتانا جنب الزبالة؟؟؟؟؟ هل ده يعقل؟؟؟؟؟
ممكن البعض منكم دالوقتى يكون اقتنع جزئيا و يقول لى ....ماااااااشى... انتى عندك حق....
طب شوية جد....
انا شخصيا مش هرتاح الا اما يمشى المجلس العسكرى..لأن ده الصح...
و مش هرتاح الا اما احس ان الفساد فعلا تم القضاء عليه فى مصر...لأن ده املنا فى الله
و كمان عارفة و متأكدة ان مصر فيها ناس كتير محترمة و مش فاسدة... و عايزة تغير و تصلح.... و الا... لو ما آمناش بكده يبقى نشك فى نفسنا احنا شخصيا و ده مش المنطق و لا العدل فى شئ
انما......
فى ظل الصراع على السلطة اللى بدأ بين الأحزاب و الجماعات و الأفراد...حتى قبل ما ... تبقى فيه سلطة فعلية يتصارعوا عليها... تم خلق حملات تشويه للكل كليلة... فلم يعد يظهر الصالح فيهم من الطالح
و من الآخر... انا شخصيا معنديش أى ثقة فى أى مرشح برلمانى او رئاسى...من أول البرادعى لغاية أبو نسمة اللى عند الكوبرى
و السؤال المعضل اللى أى شخص بيسأله- سواء نيته كويسة او لا- و بحتار فى اجابته...
لو مشى المجلس العسكرى ...مين اللى هيمسك البلد؟؟؟؟
حيص بيص وقعنا فيه النظام السابق على مدار سنين من العمل الجاد من ناحيتهم على اللعب على مفاهيم الشعب و تصوراته فيمن يصلح أو لا يصلح ليكون قائد مرحلة... واضح التوجهات... سليم النوايا
و النتيجة... الكل بقى يشك فى كله...
الناس الكويسة تاهت وسط الزحمة
الناس اللى ماتسواش راكبة و مدلدلة
و انا مش عايزة رئيس محكمة دستورية عُليا يمسك...لأنه من الحاشية
و لا عايزة برادعى
و لا سلف
و لا اخوان
ولا...
ولا...
ولا..
.............
و عايزة حد من الثورة... لا نزل ببراشوت عليها من النمسا... و لا طلع من قلب تاريخ مات و بيقولنا انه حزب له ماضى و مستقبل... و لا واحد يقولى قال الله و قال الرسول و هو سايب الشباب يتقتل قدام محمد محمود و المديرية علشان خاطر انتخابات قذرة كلها فلول و هو عارف هو هيكسبها ازاى..ماهى لعبته
عايزين قائد من قلب الثوررررررررررة
و القائد ده حاليا مش موجود....فا يقوم البعض يقول ايه.... خلاص.... يبقى نسيب المجلس... و اهه اللى نعرفه احسن من اللى مانعرفهوش....
أقولكم " لأ"................. لو فكرنا شوية فى الموضوع هنلاقى ان مفيش حد ظاهر على الساحة و لا هيظهر أصلا طول ما المجلس موجود.... انت لو عندك مجموعة موظفين شغالين تحت ايدك و انت الريس الكبير... و فيه موظف من اللى تحت ايدك هو المنسق بين باقى الموظفين و حضرتك.... و المنسّق ده ذمته مش ولابد... ايه اللى هيحصل؟؟؟؟
يوم ماهيبقى فيه موظف من الصغيرين عنده اقتراح او مشروع كويس...يفيدك و يفيد بيه العمل ككل... و يرفع المشروع ده للمنسق ابو ذمة واسعة... عمر المنسّق ده ما هيوصلك المشروع من اساسه... او ممكن يوصله و ينسب الفضل فيه لنفسه علشان ياخد هو كل الاحسان و الشكر و المكافآت....
و ده بالظبط اللى بيعمله المجلس....
فى وجود المجلس و الفلول و كل الفاسدين... عمر ما حد كويس هيظهر و لا هيبان... و فى كل الأحوال... حتى لو مفيش حد فعلا... فده فى حد ذاته مش مبرر انى اسيب الشخص القذر الفاسد فى شركتى طالما اتأكدت من فساده بكل الأدلة الفعلية المثبتة... زى ما حاصل دالوقتى مع المجلس... و الدليل دم الشهداء الذى لا يقبل أى مزايدة....
يا كنباوى يا اخويا....
لو عايز استقرار... سيب بلدك فى إيدين تآمن لها الأول و بعدها نام و ارتاح على كنبتك و محدش هيقولك حاجة
لو عايز تاكل و تشرب.. اتأكد ان اللى هيأكلك و هيشربك حد بيخاف ربنا الأول ...بدل ما تفضل تاكل و تشرب فى مسرطنات و بأسعار بتزيد يوم عن يوم... و بعد كام سنة من حكمه ماتلاقيش العيش الحاف يا تضطر تبقى فاسد زيه و تسرق.
لو عايز تتعلم كويس و تعيش انت و اولادك.... اضمن الأول مين اللى هيحط المنهج لأولادك... ماتجيبش حد بيزيف تاريخك و يلحق بيه و بيك العار و تقول انا بس عايز أربى العيال.
لو عايز تبقى آمن و تحس بالأمان.... هات اللى بيدور على تطهير الداخلية ... مش اللى بيزيدها توحش و بيربى فيها البلطجية علشان يوم ما تطلب معاه يطلقهم عليك لما يشوفك بتطالب بحقك.
اتمنى اللى يكون وصله كلامى.... و مصدقه عن اقتناع ...ينشره.........
و لو ما اقتنعتش ... احب اقولك.... لو انت كنباوى صمييييييييييييم.... خليك على الكنبة.... ماتضايقش نفسك...
احنا هنخلص الليلة ...
و انت خصيمك النبى ما تتعب نفسك و خليك قاعد مطرحك D:D:
*
*
*
*
*
*
ملحوظة هامة جدااااااااااا
الميدان (كناية عن كل شوارع و ميادين مصر) كان لديه الأمل فى أن يكون التلميذ تعلم من سقطة أستاذه و الا يتبع المجلس سياسة اللامبارك.... و يلام الميدان الآن على صبره و على حسن النية.............. بالرغم من ان محبى الاستقرار و حزب الكنبة هم أول من نادى الشباب بالرجوع من الميدان و الصبر على المجلس و إصلاحاته الوهمية مشددين على أحقيتنا بالعودة إلى الميدان اذا لم نرى استقرارا حقيقيا يثلج الصدور و لا أحسسنا بالتغيير الذى استشهد لأجله خيرة شباب مصر... و كانت النتيجة خراب مستعجل.... و عندما قررنا الرجوع الى الميدان كما كان الاتفاق...أنكر حزب الكنبة علينا أحقية الرجوع إليه للدفاع عن أنفسنا و عن مكتسبات ثورتنا.... و لا نقول غير صامدون صامدون... و ليصمت من صمت طيلة عقود...فلا مكان فى الثورة للصامتين السلبيين الذين لا يضحون بشئ غير كلمات على ورق.. و ليترك المجال لمن يقدم روحه و أطرافه و عيونه فداءا لوطنه.
تحياتى
نهى حجاج
###
